طبعا احنا بنتربي علي ان البنت حتي اما تبقي زوجة يفضلو يقولولك خليكي تقيلة ... سبيه هو الي يبادر بكل حاجة المعاملة والملاطفة والكلمة الحلوة .. ماتطلبيش قربه ابدا الا يقول عليكي قليلة ادب وبجحة ومش متربية
يا جماعة احنا لازم نغير وجه النظر المنغلقة الخاطئة دي
عارفين ليه
علشان الراجل اما بيلاقي مراتو كده بينحرف ... بيبدأـ يتفرج علي الاباحيات ع النت وعلي القنوات القذرة ويتشد لاي بنت بتقول كلمة حلوة او بتتكلم بدلع حتي لو كانت وحشة وحتي لو كانت اخلاقها مش ولا بد
يا حبايب قلبي قبل مانفضل نقول عيب عيب عيب لازم نراعي ان الست حتعيش مع جوزها وجوزها ده انسان زيها بالظبط
محتاج كلمة حلوة وحضن دافي وصدر حنين و روح تحبه وجسد يملكه يبقي حلاله الا ماحرم الله
يعني لازم نتصرف بالعقل والمشاعر
الست تكلم جوزها وتحضنه وتسمع شكوته وتعامله كأنه ابنها البكري ولازم توصل له ان الدنيا فيها ناس كتير بس في قلبها هو وبس مكتانتش تقدر تتخيل انها مرات حد غيره .. ماتتحملش تتخيل انه كان جوز واحدة غيرها
وهو خارج تدعيلو دعوة حلوة من القلب وعنيها في عنيه بتقول له بحبك .. وهو راجع بالف سلامة تفتح الباب وهي بتقول حمد الله علي السلامة وبتاخد منه الكياس ايديها تلمس ايديه وهي كلها مشاعر وعنيها في عنيه بتقوله ربنا يخهليك لينا احنا من غيرك ولا حاجة يا سيد الكل
اما تيجو تاكلو نقي لقمة حلوة وايديهالو حطي في بوقه معلقة فيها حاجة بيحبها ...البسي حاجة بيحب يشوفك بيها .... فاجئيه مرة ووشوشيه وقوليلو بحبببببببببك
و اطبخي حاجة مكنتيش بتطبخيها و قوليلو انا عاملة الاكل ده علشانك تدفي اما تيجي ياروح قلبي
قوليلو معرفش انهاردة طول اليوم بفتكر حاجات وابتسم حيقولك زى ايه قوليلو زي يوم جوازنا زي اما مكنتش لسة بعرف اطبخ وعملت كذا واكلناه معجن اي حكايات اي كلام يخليه يفتكر حاجات حلوة ويبتسم معاكي وتتقاسمو الضحكة
فاجئيه مرة واعمليلو حاجة كان نفسو فيها
اما تلاقيه بردان قوليلو دفي ايدك في ايدي
اما تاخدي منه هدومه الي قالعها بوسي الهدوم وخليه يشوفك علشان يحس بحبك له
اما تصحيه الصبح احضنيه و قوليلو يلا ياقلبي قوم علشان الشغل ربنا يفتحها عليك يارب
احفظي نكتة وقوليهالو خليه يضحك
اما تلاقيه منكد اعرفي طبعو لو بيحب يفضفض اهتمي بيه وخليه يفضفض
لو بيحب ينعزل سبيه واديلو فرصة ياخد وقته ويهدا
ماتجادليش وقت الزعل
حببي اولادك في ابوهم قوليلهم بابا ده قمر ده بيحبكم ده بيتعب علشانا شوفو اهو بابا دلوقت في الشغل واحنا مدفيين وهو سقعان علشان خاطر عيونكم الحلوة
زاكرو علشان تفرحو بابا وماما
نامو بدري علشان بابا يعرف انكم شطار
واما يجي اقفلي عليهم وعيشيه اللحظة حتي لو لحظة فضفضة ولا هدوؤ ودفا ولا استرخاء مش لازم اي حاجة خاصة بس الهدوؤ بيخلي النفس رايقة وجميلة وعندها استعداد لاي شئ
اما يزعلك ماتسمعيش كلام اي حد يقويكي عليه . ولا تشتكي لحد منه ده حبيبك وحضنك وحياتك معاه زي القبر مقفول .
لو طبعه وحش صدقيني بالمعاملة الطيبة حيبقي بيبي معاكي حتأسريه بأخلاقك وطيبة قلبك
حوشي من مصروفغك وهاتي قميص نوم جميل كل فترة كدا علشان التجديد والتغيير
افتكري عيد ميلادو حتي لو قالك ايه الجنان ده قوليلو مجنونة بيك ماتسدش نفسي ياراجل انت حنعيد يعني حنعيد وحندبحك يا شيخ سيد هههههههه.... كوليه بكلمتين حلوين ....... لو معكيش تجيبي تورتة او جاتوه اعملي صنيه كيك او كوبايتين عصير برتقان او لمون ودخليهم اوضة النوم وقوليلو كل سنة وانت طيب
خليكي دايما فاكرة ان عمار البيوت عاوز كتير جدا من التنازلات من الست علشان المركب تمشي وتعدي العواصف والرياح
خليكي دايما فاكرة ان الناس الي قبلنا ما ربوناش بالساهل ولا عاشو بالساهل لكن تعبو اوى علشان يشوفونا في بيوتنا
والي ليها بيت لازم تحافظ عليه بكل ماتستطيع من قوة
حاربي عشان تعيشي في استقرار وتعيشي عيالك بينك وبين ابوهم
ماتستسهليش الانفصال او البعد في اي مشكلة ..مايفرحش لخراب البيوت الا ابليس
ربنا يبعد عنكم وعننا كل سوؤ وكل حاجة وحشة يارب يا حبايب قلبي
ويسعدكم جميعا
منقول
هندوز
