جودي ومودي
كاتب محترف
الزوجة الشاطرة الجامدة اللي "عاوزة" تنجح فى حياتها
و تحافظ على جوزها و عيالها
ممنوع منعا باتا و نهائيا تسمح بالخصام فى بيتها...
انت تاج على راسي يا سي السيد
و كلمتك مسموعة و ليك هيبتك و كلنا تحت طوعك..
لكن خصام و كل واحد فى حتة ولا كأنك متجوز؟؟؟؟؟؟؟
نو و ستوب يا أمور...
بيتي ميدخلش فيه الخصام
ღღღ
انتي الغلطانة ولا هو الغلطان متسمحيش بالخصام فى بيتك
و متعوديش جوزك عليه و مهما حصل
متناميش الا و انتي مصالحة جوزك
اللي ربنا قر عينك بيه ..
ღღღ
و عودي جوزك من بدري بدري على كده
انه نزعل مع بعض و نتناقر ماشي
لكن هندخل بقى فى خصام و كل واحد فى حتة
يبقى اخرك خالص في ده ليلة انما التانية لأ
ღღღ
طبعا موضوعي انا بتكلم فيه عن الحياة العادية
مش بتكلم مثلا على ان واحدة اكتشفت ان جوزها بيخونها
او واحدة جوزها ضاربها علقة موت او بيشتمها بالاهل او كده..
اكيد طبعا انا مش قصدي كده لان دي حاجات لازم فيها وقفة..
انما انا بتكلم عن الخناق العادي اللي مابيخلاش منه اي بيت..
النقار العادي اللي ناتج عن ضغوط الحياة و ممكن يقلب بزعل يوصل للخصام
طيب
جوزك مقموص و انتي مقموصة بقى و شبح الخصام
و ان كل واحد هيبقى مع نفسه فى حتة داخل على البيت يبقى لازم تتحركي...
لازم تتصرفي ان الزعل ميتحولش لخصام بالكام يوم...
طيب اصالحه ازاي؟
ღღღ
هقولك عشر افكار
ღღღ
افكار متجربة... مش من الكتاب
انما من خبرة السنين مع الزوج المصري الاصيل ههههه...
يعني على طريقة اسأل مجرب ولا تسأل طبيب ..
منها افكار مينفعش تتعمل غير مرة واحدة و منها افكار ينفع تتعمل كتير
و كذا مرة و تبقى "ستايلك" فى انك تصالحي جوزك
و منها افكار تنفع لو انتي الغلطانة او افكار تانية لو هو الغلطان
و افكار تنفع فى الحالتين
ღღღ
اهم حاجة تعرفيها ان كل الافكار دي متعمليهاش و جوزك متنرفز...
انما لما يهدى و انتي كمان تهدي
يلا تعالوا ورايا
عشر طرق تصالحي بيها جوزك و تمنعي بيها الخصام من بيتك
الفكرة الاولى:
( الصلاة )
الفكرة دي تنفع سواء انتي اللي غلطانة او هو..
و تنفع تتعمل كذا مرة و برده لو كان الغلط كبير او صغير...
بمنتهى البساطة تتوضي و تروحي لجوزك تقوليله قوم نصلي..
بس خلي بالك لازم تعمليها بعد لما يكون هدي خالص
لان لو اعصابه لسه شايطة ممكن الشيطان يضحك عليه و يرفض
و ساعتها هتبقى الفكرة دي فقدت قدسيتها.
و خلي بالك برده الفكرة دي الافضل و بكتير انك تعمليها فى نفس يوم الخناقة..
و لو حاول يكلمك قوليله استنى لما نصلي
و بعد ما تسلموا تقعدي تتكلمي معاه و انتم على المصلية و تتصافوا..
هتحسي براحة نفسية كبيرة
عشر طرق تصالحي بيها جوزك و تمنعي بيها الخصام من بيتك
الفكرة التانية:
(الاسلوب المتحضر مع الحنان)
برده الفكرة دي ينفع تتعمل كذا مرة لكن على فترات متباعدة يعني مش كل خناقة..
و الفكرة دي تنفع قوي لو انتي الغلطانة
او لو الموضوع تايه مش واضح مين اللي غلطان الاول..
لكن منصحكيش قوي انك تعمليها لو جوزك اللي غلطان غلط جامد..
ممكن و هيبقى كرم اخلاق منك
بس الافضل زي ما قلتلك انك تعمليها لو انتي اللي غلطانة...
طبعا الاسلوب المتحضر معناه ان اللي غلط يعتذر
لكن مفيش واحدة فينا هتروح بسهولة تقول لجوزها "انا اسفة"...
تقيلة برده مش كده؟.. طب تعملي ايه؟.. اقولك لاني جربتها كتير..
لازم يبقى جوزك قاعد و انتي واقفة و تبقى لابسة حاجة محترمة مش لبس اوفر
و تروحي تقربي منه و تحطي ايدك حوالين كتفه
و تقربي من جنبه و تلزقي قوي جسمك في جسمه
زي ما تكوني بتحضنيه او معنى ادق بتحتضنيه
(عشان كده قولتلك هو قاعد و انتي واقفة من جنب مش قدامه)
و تقوليله بحنية حقيقية (مش تمثيل) "حقك عليا"..
و تكون ريحتك حلوة بس مش حاطة برفان مغري
او يعني البرفان اللي بتحطيه فى ساعات العلاقة و الشقاوة و كده..
لان ده هيبقى له تأثير عكسي
لانه هيفهمها انك عاوزة تأثري عليه او تستغلي ضعفه
و لو هو حساس هتجيب معاكي نتيجة عكسية..
لا خلي مجرد ريحتك حلوة و خفيفة و لبسك هادي
و اسلوبك حنون من غير جرأة و بمنتهى الرقة (مش السهوكة)
بمنتهى المشاعر تقوليله "حقك عليا"..
و بعديها ارفعي دقنه بايدك رفعة خفيفة حنينة
هتبقي بصاله من فوق و هو فى حضنك
وساعتها بصيله جوه عينيه قوي جوه عينيه
لدرجة انك تبقي مش شايفة حاجة غير عينيه (بحنية مش بشقاوة)
و قوليله "انا مليش غيرك" و خديه فى حضنك..
اهم حاجة فى الطريقة دي انك متبقيش شقية ميبقاش فيه شبهة دلع و مياصة..
احب اقولك النتيجة لما تعودي جوزك على كده
هتبقى مفاجأة بالنسبة ليكي و هي انه لما هو اللي يغلط هتتفاجئ
انه جاي يصالحك بمنتهى الادب و الخجل..
صدقيني و عن تجربة..
لانك كده بتعوديه على حاجتين
اولا الاخلاق الرفيعة و التحضر
و ثانيا قربكم قوي من بعض كزوجين
على المستوى الروحاني مش الجسدي و بس..
ღღღ
فكرة انك تلمسي جوزك بحنان باحترام من غير مياصة
بتقربك من الحب اكتر من الاغراء و بتعود جوزك على حضنك
و بتحسوا بالامان المتبادل فى حضن بعض..
و ممكن تنوعي طبعا فى الوضع و الطريقة اللي بتلمسي جوزك فيها بحنان (مش باغراء)
يعني ممكن تيجي من وراه و تحضنيه قوي
و انتي منيمة راسك على ضهره و تقوليله
"حقك عليا انا مليش غيرك"
عشر طرق تصالحي بيها جوزك و تمنعي بيها الخصام من بيتك
الفكرة التالتة:
(التمثيل و الدوخة و الاغماء و الذي منه)
طبعا الفكرة دي قوية جدا و تنفع قوي لما تبقى الامور شايطة و نار و على اخرها
و تنفع قوي لو انتي اللي غلطانة
و ممكن تساعدك لو هو اللي غلطان
بس انتي عارفة انه عنيد و متعجرف او اعصابه شايطة منك على الاخر...
و طبعا كلكم عارفينها
و هي انك تسخسخي
و تعملي نفسك وقعتي و مغمى عليكي...
طبعا فكرة ممتازة و بتجيب من الاخر
بس احب احذرك من حاجتين..
اولا حوشي الفكرة دي عند اللزوم و بس و متحرقيهاش بدري
و على مواقف مش مستاهلة..
لان طبعا بعد كذا مرة هتبقى مفقوسة و خاصة لو جوزك ذكي..
و ممكن من كتر تكرارها تفلت منك و متظبطيهاش..
يعني من الاخر حاولي كده تحوشي الفكرة دي
و متعمليهاش غير مرتين تلاتة طول حياتك الزوجية..
و تاني حاجة حاولي تبقي ذكية
بمعنى انه تعمليها لما يكون فيه عامل مساعد يساعدك انك تسبكيها و تدخل عليه
زي مثلا انه تكون عندك البريود
او بقالك فترة مرهقة فى البيت او داخل عليكي برد...
بصي زي ما قلتلك هي فكرة ممتازة لكن حوشيها لوقت اللزوم
عشر طرق تصالحي بيها جوزك و تمنعي بيها الخصام من بيتك
الفكرة الرابعة:
( الاغراء المباشر و العلاقة)
و هي بمنتهى البساطة انك تلبسي حاجة نار نار نار..
و تدخلي السرير و تندهي جوزك او تستنيه لما ييجي من نفسه... على حسب..
و بدل ما تعملي نفسك مغمى عليكي زي الفكرة اللي فاتت
لا يادوب تعملي نفسك مصدعة او دايخة شوية
و لما ييجي جنبك تشيلي الغطا و انتي و تقديرك للموقف بقى
اما تغريه و تتمسحي فيه اما تتوكلي على الله
و تشديه من البيجامة و بسم الله الله اكبر هههههههه.....
ღღღ
على الرغم من ان الطريقة دي من اسرع الطرق اللي بتيجي على بالك
لكن عيبها انها متنفعش فى حالات كتير.. ليه؟ اقولك..
بصي هي الطريقة دي زيها زي اللي فاتت..
قوية و ممتازة لكن لما بتستخدميها كتير بتفقد تأثيرها
و بالتدريج هتباني قليلة الحيلة قدام جوزك و محيلتكيش غيرها....
استعملي الطريقة دي لما يبقى الموضوع تايه فيه مين الغلطان
او يعني محدش غلط فى التاني بشكل مباشر انما انتوا الاتنين عليكم غلط
و مسكتوا في بعض فى ساعة شيطان..
و كمان ممكن تستعملي الطريقة دي لما تحسي انك انتي و جوزك عمالين
تحوموا حوالين بعض و تتمحكوا فى بعض
و نفسكم تتصالحوا بس محدش قادر ياخد الخطوة..
و كمان ممكن الطريقة دي تفيدك لما البرود و الجمود يطول شوية بينكم
و لما يغلب حمارك شوية و يبقى خلقك ضيق و عاوزة تجيبي من الاخر..
و لما تحاولي تعملي افكار تانية بس متظبتش معاكي...
بس يعني باختصار انا منصحكيش بالاغراء المباشر و الصريح
غير لما يغلب حمارك قوي.
انما انصحك قوي بالطريقة اللي جاية دي بدالها
عشر طرق تصالحي بيها جوزك و تمنعي بيها الخصام من بيتك
الفكرة الخامسة:
(خلطة الجرأة مع السهوكة (الهجوم بثقة))
مش شرط الفكرة اللي فاتت بتاعت استغلال العلاقة بشكل مباشر..
انما ممكن السهوكة سواء هترسي على علاقة او لأ... السهوكة؟
بس استني مش اي سهوكة..
الطريقة دي للمزز بس.. اللي الموزة فى "الاسلوب"
و اللي واثقة من نفسها و بس..
لو مش واثقة فى نفسك و هتتلجلجي متعمليهاش..
و كمان متعمليش الطريقة دي لو جوزك اللي غلطان
لان ده مش حلو لكرامتك (من وجهة نظري)..
انما الطريقة دي ممتازة لو انتي اللي غلطانة و جوزك مش متعصب قوي ..
يعني مقموص بس مش متنرفز..
هتلعبي يا موزة على اعصاب جوزك
انك انتي اقوى منه و ليكي تأثير عليه.. هتلعبي على الثقة ..
مين فينا اللي واثق و متأكد ان تأثيره اقوى على التاني؟
انت لسه هتفكر يا أمور؟ طبعا انا.. و بثقة رهيبة...
قوة الطريقة دي مش فى الصلح نفسه
انما قوتها فى ان ليها مزايا كتير بره الصلح و اكبر من يادوب الصلح..
ღღღ
فكرة انك لما تبقي انتي اللي غلطانة
و تصالحي جوزك بالطريقة دي و بالذات الطريقة دي بتديكي ثقة رهيبة فى نفسك
و سيطرة ممتازة على جوزك على المدى البعيد..
بس للاسف هي ملهاش كلام يشرحها انما هي متجيش غير بالامثلة..
السر مش فى "السهوكة" انما السر فى "المفاجأة"
فى انك مش تروحي و انتي باين انك هتتسهوكي.. لا انما المفاجأة و بجرأة ..
لان المفاجأة هي اللي هتخليه ميقاومش السهوكة..
تلبسي عادي مش جرئ و مش عريان
يعني مثلا مجرد ترنج ضايق او حاجة مكسمة و بس..
حاجة شقية ايوة بس مش ملفتة قوي عشان ميبانش ان نيتك حاجة ...
عشان المفاجأة..
ღღღ
و نقول بقى اربع امثلة..
مثال واحدة صاحبتي عملته و تلاتة انا اللي عملتهم:
عشر طرق تصالحي بيها جوزك و تمنعي بيها الخصام من بيتكالمثال الاولاني:
تعملي صنف حلو و تاخدي حتة منه فى طبق
و تروحي تتسحبي من ورا جوزك و هو مثلا قاعد على الكمبيوتر
او بيعمل اي حاجة و تجهزي اللقمة فى الشوكة
و تحاولي انها تكون لقمة كبيرة جدا اكبر من بق جوزك
لو حتطيها فى بقه هيتسد و لما يلف تدفسيها فى بقه كده بالعافية
من غير ما يلحق يستوعب انتي بتعملي ايه
و تقوليله "ايه رأيك حلوة؟"
مش هيبقى عارف يتكلم لانك هتبقي سديتي بقه باللقمة الكبيرة دي
تقومي حاطة الطبق على جنب و مخبطة على ضهره كده
و انتي بتقولي خد نفسك اجيبلك كوباية مياه ..
و اثناء ما هو متفاجئ او بيكح او اي حاجة
تقومي مقربة منه قوي لزق جدا جدا
و تحطي عينك جوه عينيه بس المرة دي بشقاوة فظيعة
و تقوليله "مش هتصالحني بقى؟ انا مسامحاك على فكرة"
و تضحكي بمياصة (خلي بالك انتي اللي كنتي غلطانة)
و اثناء ما هو بيستوعب المجنونة اللي هو متجوزها دي بتعمل ايه
تحاولي تبوسيه فى رقبته تقربي نفسك منه او تبوسيه جنب ودنه كده يعني...
عشر طرق تصالحي بيها جوزك و تمنعي بيها الخصام من بيتكمثال تاني:
خدي بالك انتي فى جنب و هو فى جنب و مقموصين و انتي الغلطانة
تقومي تلبسي حاجة مكسمة و تروحي بمنتهى العصبية
و ماشية بسرعة جدا كأنك بتجري و تقوليله :
"ممكن تيجي بسرعة تشوف ايه اللي عمال يعمل صوت خربشة و تخبيط فى شباك المطبخ ده؟"
يقوم هو يروح و انتي تعملي نفسك خايفة تدخلي المطبخ
فهو اللي هيدخل قبلك و انتي هتبقي وراه
بس تبقي بقى وراه على طول في ضهره بالضبط..
طبعا مش هيلاقي حاجة فهيلف عشان يقولك "مفيش حاجة"
لكن اول ما يلف و هو يادوب قال "مفيش...."
و قبل ما يلحق يقول "....حاجة" تقومي ناطة لفوق و لافة ايديكي حوالين رقبته
و لازقة شفايفك فى شفايفه..
على ما يستوعب انتي عملتي ايه هتكوني انتي خلاص دوبتيه خالص.....
عشر طرق تصالحي بيها جوزك و تمنعي بيها الخصام من بيتك مثال تالت:
تلبسي حاجة بقى جامدة المرة دي (بس مش لانجيري)
انما حاجة مفتوحة بقى و كده و تغرقي نفسك برفان
من البرفان اللي بيغري جوزك جدا..
و جوزك يكون قاعد في حتة و انتي فى حتة
و تلبسي حاجة فى رجلك بكعب يرن
و تقصدي انك تروحي على جوزك و انتي ماشية بسرعة و بعصبية و جامد
تبقى خطوتك سامعها قبل ما توصلي
و تروحي بجرأة و تقوليله بجد جدا جدا جدا و بتحدي و بسرعة قوي
"بص بقى انا لا جاية اصالحك و لا جاية اترجاك"
و تقربي منه و تبصيله جوه عينيه باغراء فظيع
و تقوليله "انا جاية استفرد بيك"
و لسه هيتكلم بقى او بيحاول يتكلم تقومي قاطعة كلامه و.....
انتي عارفة الباقي...
ولا مش عارفة؟؟!! يا حومتشي ما داهية لتكوني مش عارفة ههههههههههه.....
عشر طرق تصالحي بيها جوزك و تمنعي بيها الخصام من بيتك مثال رابع:
هي نفس الحركة اللي فاتت بس الصورة المختصرة بتاعتها..
تلبسي لبس حلو و البرفان اللي بيحبه و تروحي تقعدي قدامه
و تقولي (مش بمياصة انما بنص ضحك)
"بص بقى انت عارف اني مش بحب الخصام"
هيقوم يحاول يتكلم متديلوش فرصة و تبصي الناحية التانية
و تقولي بصوت عالي و بشقاوة السنين
"يووووووووو والله مفياش حيل النهاردة
بس مبدهاش بقى تعالى يا مغلبني"
و تقومي على طول على بعلولتك و بسم الله الله اكبر ههههههههههه...
ღღღ
قبل ما نقفل كلام فى الخطط دي
بفكرك ان الخطط دي تعمليها لما يكون جوزك مقموص
وواخد جنب انما مش متعصب..
و لما تكوني انتي الغلطانة مش هو
عشر طرق تصالحي بيها جوزك و تمنعي بيها الخصام من بيتك
الفكرة السادسة:
(وصفة الست المصرية الاصيلة (النكد مع الرغي))
شربتي من نيلها ؟؟؟ تبقي نكدية هههههههههه...
متحاوليش اصل دي فى الجينات يا قمر...
طب انتوا عارفين لو عملنا استفتاء ايه اكتر فكرة هتعجب الفتوكات
ممكن تطلع اي فكرة من العشرة دول
لكن لو عملنا استفتاء ايه اكتر فكرة هتتنفذ هتطلع الفكرة دي.. اه والله...
اصلنا موهوبين فيها يا اوختي مشهورين بيها بين نساء العالمين...
و انا اولكم على فكرة عادي يعني كلنا الست المصرية الاصيلة.... ما علينا..
ღღღ
شوفي يا نكدية منك ليها هههههههههه....
هو ينفع تستعملي النكد عشان تصالحي جوزك؟ معقولة؟
ايون ينفع قوي كمان و دي طريقة مجربة و متوارثة من جيل لجيل
و نسبة نجاحها عالية على فكرة..
انتي عارفة "خدوهم بالصوت"؟...طيب هتاخديه "بالدموع و الرغي"... الاتنين؟؟؟؟....
ايون و خلي بالك...
بنات كتير بتسمعيهم يقولوا قعدت اعيط و هو ولا عبرني
و زمان كنت لما اعيط يجري يصالحني
انما دلوقتي "ادخل" اعيط يسبني و لا يعبرني و يقولي اتفلقي... ليه؟
لانها عيطت بس.. عيطت بعيد و مستنياه يجيلها... لا... كده متبقاش مصرية اصيلة
كده تبقى مخلطة..
المصرية الاصيلة تعيط قدام جوزها و تفتح بقها و دودودودودودود و ززززززززز و لوكلوكلولكلولك
ارغي و انتي بتعطي و فكريه بغلطاته من مليون سنة
و اتشحتفي و انتي منهارة من العياط و ارغي
"حرام عليك انت مش حاسس بيا ماهو انا غصب عني
طب اعمل ايه انا مش قادرة استحمل انا ياما حاولت اني.........(و ارغي بعياط)........
و الله مظلومة دانا .........(و ارغي بعياط)........
طب انت عارف انا امبارح كنت عند ماما و.........(و ارغي بعياط)........
طب تصدق انت لو فكرت .........(و ارغي بعياط)........
على فكرة انت فاكر لما .........(و ارغي بعياط)........".......
ورا بعضه ورا بعضه ورا بعضه ورا بعضه دودودودودودو و اتشحتفي
و خلي بالك ان الرغي ورا بعضه ورا بعضه هيخليكي تنهجي و تتشحتفي بجد......
اوعي تقوليلي انه هيعرف يزعق و يسكتك و يقولك اخرسي و ..... لاااااااااا...
متبقيش ست مصرية اصيلة و متمرش فيكي خير البلد دي عليكي هههههههه...
لا لو ظبطيها و عرفتي تستعمليها امتى هيحصله حاجة من اتنين....
اما هيبتدي يسقط و ينام منك ههههههه (و دا غالبا)
تقومي قايمة عليه و قايلة "يا ساتر والله دي كانت ساعة شيطان دانا (و ارغي بعياط)....
خلاص صلي على النبي تعالى نخش ننام دلوقتي تبات نار تصبح رماد
(و ارغي من غير عياط بقى يا نكدية)"
و هيصحى زي الفل ان شاء الله واخد تطعيمه
و هااااادي جدااا و مستسلم لامر الله جداااا...
اما هتصعبي عليه من الشحتفة و هيصالحك و ينام من الصداع و الارهاق
و انتي تدخلي المطبخ كده تعمليلك لقمة حلوة كده بقى
و تستمعي بالنصر
و تحيا جمهورية مصر العربية
عشر طرق تصالحي بيها جوزك و تمنعي بيها الخصام من بيتك
الفكرة السابعة:
(العيال)
الفكرة دي تنفع سواء انتي الغلطانة او هو
و تستعمليها لما تتقمصوا من غير غضب كبير..
يعني من غير معارك جامدة و كده....
طبعا مش هتقولي للعيال روحوا خلوا بابا يصالحني..
انما هتستعملي العيال بكل ما يخطر على بالك من ما يخص العيال...
مثلا تسيبيلوا العيال يقعد بيهم و انتي مشغولة فترة طويلة
او في مشوار اكيد حوار هيتفتح لانه هيحتاس بيهم..
مثلا تقومي اي شكل بسيط بين العيال على لعبة ولا حاجة
عشان تمثلي انك مش عارفة تسيطري عليهم و يضطر هو يتدخل..
مثلا تدخلي عليه بمشكلة للعيال تخليه غصب عنه يتكلم معاكي و الجليد و الصمت يفك..
مثلا تلعبي لعبة مع العيال على قرب منه بحيث انه يشارككم....
بصي هما العيال هينفعوكي كعامل مساعد مع الافكار التانية
و بالذات لما تكونوا بصفة عامة بيت سعيد و خناقاتكم قليلة
عشر طرق تصالحي بيها جوزك و تمنعي بيها الخصام من بيتك
الفكرة الثامنة:
(التعذيب على نار هادية)
خدي بالك الفكرة دي على الرغم من قوتها الرهيبة لكن متنفعش الا فى حالة واحدة بس....
الفكرة دي تعمليها امتى؟...
لما يبقى جوزك الغلط راكبه من ساسه لراسه و زعلك جامد
و انتي مردتيش عليه
(خلي بالك يا اوختي من الكلام.. و انتي مردتيش عليه و متمسكش عليكي ولا غلطة)
بس تلاحظي انه ندم انه كبر الموضوع قوي كده
و عمال يفرك حواليكي نفسه يصالحك بس مش قادر او مستكبر انه يصالحك..
هيموت و يصالحك يعني بس كرامته مش جايباه مش قادر ياخد الخطوة..
طيب يبقى نساعده انه ياخدها.. تعملي ايه؟
يوم بليلة كده كورس تعذيب لحد ما يصالحك..
متفصليش عنه لا خليكي على قرب بس باسلحة تعذيب..
مثلا هو قاعد على الكنبة تقومي مغرقة نفسك برفان من اللي بيموت فيه
و تلبسي روب و تحته هوت شورت او ميني جيب
و تقعدي على الكرسي اللي فى نفس الاوضة اللي هو فيها
و تحطي رجل على رجل طبعا الروب هيتفتح
و تقعدي تهزي الرجل اللي فوق دي
و البرفان اللي هو بيموت فيه جايب اخر الدنيا
و انتي منتهى البرود ولا كأنك شايفاه...
و تقومي تعملي اي حاجة و ترجعي تاني و هكذا....
مثلا برده هو قاعد في حتة تقومي لابسة هوت شورت المرة دي على طول
و تروحي تقعدي فى نفس الحتة مش جنبه انما على قرب منه
و تقعدي تحطي مانيكير فى رجليكي و الهوت شورت عامل شغل...
مثلا هو ممدد على السرير تقومي جاية لابسة ستوماك
و تدخلي الاوضة ولا كأنك شايفاه و تقعدي على التسريحة
تمسكي بلاشر و تقربي من المراية
و انتي متنية كده على كرسي التسريحة نص تنية لقدام
و تلعبي بالبلاشر فى وشك و يا سلام لو كنتي لابسة جي سترنج...
مثلا تلبسي حاجة مكسمة موت من تحت و بادي كت من فوق او مفتوح
و تقفي قدام المرايا بالجنب و ترفعي شعرك بايديكي الاتنين لفوق
و انتي بتبصي على نفسك
و ممكن تقفي على طراطيف صوابعك كده لاي سبب
قال يعني بتشوفي حاجة او بتظبطي حاجة و تطلعي من الاوضة..
مثلا تغيري هدومك و انتي مواربة باب الحمام
و لما يكون معدي تلفي تديله ضهرك... و هكذا..
ماهو خلي بالك انتي هتعملي كده امتى؟ لما يبقى هو الغلطان
و تحسي انه بيفرك حواليكي عاوز كلام يتفتح بس مستكبر يصالحك..
دا جوزك و انتي عارفاه و هتعرفي كويس قوي امتى تستعملي الطريقة دي..
ღღღ
الطريقة دي هترسي على حاجة من تلاتة..
اما انه يصالحك بشكل مباشر (و دا مش الاغلب)...
و اما (و دا برده مش الاغلب) انه يتنح و يقدر يقاوم (ظاهريا)
و هنا بقى تنقلي بثقة و انتي مطمنة على الفكرة الرابعة او الخامسة
اللي كانوا فوق لان فرشتيلهم فرشة صح...
اما (و دا الاغلب) انك هتلاقيه خلاص بقى منهار
و بيتكلم معاكي يعني بدل ما كان بيحاول يفتح كلام
لا خلاص بيتمحك فيكي بقى بشكل مباشر
و بيفتح مواضيع و عايز يمثل انه ولا كأن حاجة حصلت
و هنا خلاص انصحك تتجاوبي و تتكلمي معاه عادي
و توقفي عشان ميشيطش منك
مش لازم يعني يكون الاعتذار بشكل مباشر..
عشر طرق تصالحي بيها جوزك و تمنعي بيها الخصام من بيتك
الفكرة التاسعة:
(البرود مع الغتاتة)
الطريقة دي تنفع لما يكون هو الغلطان بس غلط بسيط مش جامد..
او لما يبقى محدش بالتحديد اللي غلط انما كانت ساعة شيطان و خلاص..
لكن متعمليهاش ابدا لو انتي اللي غلطانة غلط صريح و الغلط راكبك انتي...
والله الفكرة دي صدقيني قوية جدا
بس للاسف مش هتعجب الا عدد قليل من البنات...
الفكرة دي عاوزة واحدة شخصيتها قوية جدا
و اعصابها تلاجة و تنفع اللي بيشتغلوا اكتر من ستات البيوت
او تنفع اللي متسلية بعيالها و مامتها و جيرانها
او اللي عندها هوايات كروشيه و مطبخ و خلافه
يعني من الاخر اللي جوزها مش المحور الوحيد اللي في حياتها..
بس حتى لو انتي مش دا كله ممكن تقلديها..
البرود مع الغتاتة يعني غسيل مخ
انه "ولا حاجة حصلت.. ايه ده هو فيه حاجة حصلت؟ امتى؟ مش فاكرة"..
ღღღ
خلي بالك متفهميش الفكرة دي انها تقل و طناش لا لا لا لا لا
الفكرة دي هي استهبال رسمي صريح انه "ولا حاجة حصلت"
و تعامل عادي جدا.. البرود هو انه "ولا حاجة حصلت"
و الغتاتة هي "الاصرار على كده"...
ولا اي حاجة تصحي تكلميه عادي جدا..
رد مردش و لا اي اندهاش..
بمنتهى التناحة تبعتيله رسالة انك عاوزة حاجة يجيبها و هو جاي..
تطلبي منه يناولك حاجة منولهاش
تطلبيها من بنتك و تاخديها بمنتهى البرود..
تتعاملي عادي خالص بمنتهى القوة و التحدي
انه "غصب عنك مفيش حاجة حصلت و مش هنتخاصم"
و تساعدي نفسك فى انك تفتحي كلام فى حاجات مهمة
حاجات بخصوص العيال و مدارسهم
حاجات بخصوص البيت بخصوص الاهالي..
و مفيش مانع يرجع يلاقي مامتك بتزوركم
و انتي عمالة بترغي معاه و لما يدخل تكلميه عااااااااادي جدا ولا اي حاجة..
بصي اللي هتفهمني هي اللي شخصيتها قوية بجد..
انتي من جواكي الفي كذبة انه "محصلش حاجة و احنا مش متخاصمين"
لحد لما تصدقي الكذبة دي هتلاقي نفسك بتتعاملي عادي
بمنتهى القوة و التحدي و الاصرار
و هتأثري عليه لانك هتبقي اقوى منه
و بصفة عامة جوزك اللي بياخد مودك مش العكس..
ღღღ
انتي عارفة قوة الطريقة دي في ايه؟
في انها طريقة رجالي.. اه والله..
انتي كده هتغلبي جوزك بطريقته..
هي فرض امر واقع انه
"غصب عنك مش هنتخاصم" او "احنا مش متخاصمين ولا حاجة
انا عن نفسي زي الفل انا مش عارفة انت مالك"..
و عشان كده قلتلك هي عاوزة واحدة حياتها مليانة جدا بحاجات غير جوزها..
بس برده ممكن تقلديها..
و خلي بالك انا قلتلك اوعي تعملي الفكرة دي لو انتي اللي غلطانة
عشر طرق تصالحي بيها جوزك و تمنعي بيها الخصام من بيتك
الفكرة العاشرة:
(الذكريات)
اخر فكرة تنفع للبنات اللي بصفة عامة سعداء مع اجوازهم
ربنا يسعد كل بنات المسلمين يا رب..
البيت الدافي الهادي الملموم على بعضه
و ملوش اختلاط كتير بالناس و الاسرة السعيدة
و الكابل اللي بصفة عامة متفاهم و مكفيين بعض
مبيدوروش على صحاب كتير و عندهم اكتفاء ذاتي بنفسهم
و خناقاتهم قليلة بس كانت ساعة شيطان
و من كتر ما هما مولفين على بعض
ولا تفرق معاهم نهائي مين اللي ابتدا بالغلط
و لا مين اللي قال ايه و لا اللي عاد ايه....
ღღღ
و خلي بالك لو انتي فعلا حالتك كده يبقى انتي السبب
و انتي اللي ناجحة و انتي فعلا مديرة البيت
و رئيسة مجلس ادارة حياتكم..
و بالتالي انتي اللي لازم تتحركي
عشان تبعدي شبح الخصام عن البيت السعيد ده...
بمنتهى البساطة تودي العيال عند مامتك او تنيميهم بدري
و تلبسي حاجة بقالك كتير ملبستيهاش
حاجة ليها ذكرى عندكم و محتفظة بيها
و تجهزي عشا جميل هادي خفيف و لذيذ
و تعملي تسريحة حلوة هادية
و تستني جوزك و تسيبيه يقعد ياكل لوحده
لانكم طبعا زعلانين شوية بس تيجي بعد دقيقة تقعدي جنبه
و تفتحي الكلام بخصوص اي حد من عيالك انه عمل حاجة
و تطلعي من دي على ان العيل ده طول عمره كده فاكر لما.....
و تمسكي بقى فى كلمة فاكر و الكلمة هتجر الكلمة
و مرة فى وسط الكلام هتلاقي نفسك انتي اللي بتصالحيه
و مرة هو اللي بيصالحك...
ღღღ
و يا رب دي تبقى حياة كل بنات المسلمين يا رب
لان بجد انتي اللي بايدك كل شئ و بايدك ازاي تمشي حياتك
بصي بعد الموضوع الطويل قوي ده
هختم معاكي بكلمة بسيطة..
ღღღ
انا اثناء ما انا بكتب الموضوع ده
كتبت مواضيع كتير عن طريقة الكلام مع جوزك
و ازاي تاكلي عقله بلسانك الحلو
و عن ازاي تعودي جوزك على حاجة
و عن عن عن
بس اللي حابة اقوله انه من وجهة نظري المتواضعة جدا جدا
اخطر عدو ليكي هو الخصام
و الزوجة اللي بجد "عاوزة" تنجح
متسمحش ابدا لجوزها انهم يبقوا تحت سقف واحد و كل واحد فيهم في حتة..
لا اتصافوا اول باول و انتي اللي بايدك كل شئ..
خلي عندك ثقة فى الله ثم فى نفسك..
خلي عندك ثقة فى الله لانه عطاكي اسلحة كتير من جمال و مكر
و حيلة و اصرار و قدرة على الاحتمال و حنان و عيال
و دموع و هوايات و و و و وو ...
انتي اقوى من جوزك بكتير و اسلحتك اكتر منه بكتير
و افكارك اكتر منه بكتير و انتي الحياة انتي الاساس
و جوزك على ما تعوديه و صدقيني اللي "مصرة تنجح" بتنجح ..
كل اللي بيبقى ناقصها توفيق من ربنا..
بس اللي "مصرة تنجح" بتبقى عندها مثابرة
و مهما حصل مبتيأسش
و مهما جربت من حاجات و فشلت بتجرب تاني و تالت و مليون
و شعارها فى الحياة العادية هو:
" باذن الله هنجح يعني هنجح باذن الله هنجح "
و شعارها عند المشاكل هو:
" ماهو يا انا يا انت و باذن الله اكيد انا ...
باذن الله اكيد انا .... اكيد "
و ربنا يسعد كل بنات المسلمين اللهم امين
ღღღ
عشر طرق تصالحي بيها جوزك و تمنعي بيها الخصام من بيتك
