احذرى جرح كرامة زوجك

[جودي ومودي]

كرامة جوزي

هكلمكم عن شوية مواقف

تحاولي انك تتجنبي فيها انك تجرحي كرامة جوزك

و كمان شوية مواقف تانية انك لو فعلا جرحتيها

سواء بقصد او من غير قصد يبقى تتصرفي ازاي

قبل ما نقول المواقف عاوزة اقولك

انه اكيد احنا كمان عندنا كرامة زي الرجالة..

لكن فيه مواقف بتبقى بالنسبة لينا عادية

و مش مستاهلة لكن الرجالة

بياخدوها على كرامتهم قوي و بشكل اوفر..

يعني مش احنا بس اللي بنعمل من الحبة قبة باضحك

كرامة جوزي

الموقف الاول:

من اكتر الحاجات اللي بتستفذ كرامة جوزك

و ياخدها على نفسه قوي قوي

هي تدخلك فى عاركة هو مشترك فيها

سواء كانت عاركة فى الشارع مثلا

او زعيق كبير عمال يزعقوا مع اهله

او الجيران او حد من صحابه و هكذا...

الراجل بيعتبر ان هو قايم بالواجب

لكن تدخلك سواء معاه او ضده

او بزعيق بداله او حتى بزعيق معاه

بيضايقه بشكل رهيب..

و خصوصا لو كانت العاركة دي

مع حد علاقتكم معاه مستمرة..

زي الجيران مثلا..

هنا بيتضايق اكتر بكتييييييييييير من لو كانت مع حد غريب..

فمثلا هو عمال بيزعق مع جار

او مجموعة ناس و انتي تدخلي بقى

و تشتركي فى الزعيق

دي بياخدها على كرامته قوي..

و يا سلام بقى لو حد ابن حلال راح مزعقلك

او قال بخبث "انا بتكلم مع الراجل يا مدام"..

تبقى خربت
كرامة جوزي

عشان كده الوقاية خير من العلاج...

لو شايفة جوزك خلاص مندمج بقى فى العاركة

و الزعيق سيبيه منصحكيش انك تتدخلي ابدا..

الا لو بصنعة لطافة قربتي منه

و كان الوضع يسمح انك تهديه بكلمتين

كرامة جوزي

الموقف التاني:

برده من المواقف اللي بياخدوها قوي قوي على كرامتهم

هي مسألة الاعتذار الرسمي الصريح..

الرجالة معندهمش "ثقافة الاعتذار"..

انه يقف و العين فى العين

و يقول بالعربي الفصيح"انا اسف"..

و الدكتورة ناعمة الهاشمي قالت

ان طريقة الرجالة فى الاعتذار هي اقامة العلاقة..

و كمان نصحت الزوجات انهم يقبلوا

كرامة جوزي

و هنا وجهة نظري الشخصية

ان لو غلط بسيط و يعدي

او حتى متوسط و لقيتيه باسلوب الرجالة

عاوز يتصرف باستهبال و تماحيك انه "كأن شيئا لم يكن"

خلاص اقبلي و بلاش خصام

كرامة جوزي

لكن لو الغلط كبير قوي

(مثلا ضرب او شتيمة جامدة و خلافه)

فطبعا من حقك انك تاخدي موقف

و تصممي انه يراضيكي باعتذار رسمي..

كرامة جوزي

و هنا بقى اعملي الحاجتين دول:

1- حاولي على قد ما تقدري

انك متسيبيش بيتك ابدا.. ليه؟

لان مسألة انه يراضيكي

او يقول بالفم المليان "انا اسف" قصاد الاهالي و الناس و كده

هتصعب الموقف جدا..

لكن لو على قدكم انتم الاتنين

و بيتكم مقفول عليكم و محدش شايفكم غير ربكم

يبقى هيبقى اسهل انك تفضلي وراه

لحد ما يعتذر اعتذار رسمي..

يعني عاوزة اقولك ان تدخل حد تالت

هيصعب مسألة اعتذاره الصريح
كرامة جوزي

2- اياكي تتمسك عليكي غلطة..

خليكي هادية و باردة

و متتجرجريش معاه لمبادلة الضرب مثلا بالاهانة

او اللسان اللاذع او المعايرة..

هيضيع حقك.. و هتبقى غلطة قصاد غلطة..

و الغرور الرجالي هيخليه يقولك احنا الاتنين غلطنا

و هيضيع حقك

و هتبقي عطيتيله على طبق من فضة

فرصة الهروب من الاعتذار..

لا خليكي حريصة بمكر ان الغلط يبقى راكبه لوحده

و امسكي اعصابك عشان تكسبي

كرامة جوزي

و قبل ما نقفل الموقف ده عاوزة اقولك

انه لو اجبرتي جوزك على الاعتذار الصريح

و خصوصا قصاد الاهالي هتلاقيه عادة بياخد فترة كده منزوي

و راسم دور التقيل اللي مش بيجري وراكي..

لان كرامته بتبقى ناقحة عليه قوي

و حاسس انه اتذلل شوية..

هنا انصحك انك متضغطيش عليه

و متجريش وراه و لكن انتي كمان خليكي تقيلة

و سيبي التعامل ييجي لوحده

و سيبيه هو اللي يبدأ التعامل

و لما يبدأ خليكي حنونة و احتويه

عشان تخفي توتره و ميتبنيش بينكم حاجز..

يعني تبقي تقيلة لكن لما يعوزك او يجيلك

او يكلمك يلاقيكي فاتحة دراعاتك لحد ما السحابة دي تعدي

كرامة جوزي
الموقف التالت:

هو شبه الموقف الاولاني بتاع العراك بس بتعديل بسيط

و هو ان ساعات جوزك

بيبقى مش عاوز انك تحلي محله فى موقف معين..

يعني مثلا واقف بيفاصل مع بياع

و انتي تدخلتي راح مشاورلك انك تقفي او متتكلميش..

مثلا راكبين مواصلة و هو بيحاسب

و بياخد الباقي و السواق معاند معاه

جيتي انتي حاولتي تتكلمي راح غمزك تسكتي..

مثلا بيتجادل مع حد زي ابوه او اخوه فى موضوع

و انتي حاسة انهم جايين عليه

فجيتي تشتركي فى المناقشة راح غمزك مش تدخلي......

الحاجات الصغنونة دي كلها اسمعي فيها كلام جوزك

لان مخهم صغير قوي فى الحاجات الصغيرة دي

و ممكن يقفش و اغلبيتهم عصبيين...

مواقف هبلة و عادية بس بياخدوها

على كرامتهم قوي
كرامة جوزي

الموقف الرابع:

هي مش مسألة الطاعة

و لكن مسألة "فرض امر واقع بالعافية"..

الطريقة دي ذكورية مش انثوية

و الرجالة مش بييجوا بيها و بتعمل مشاكل كتير..

الحاجات دي بياخدوها على كرامتهم بافورة رهيبة..

يعني مثلا :

هو محكم رأيه انه متزوريش مامتك غير مرة فى الاسبوع

و انتي نفسك تخليهم تلات مرات..

مثلا يعني..

جيتي انتي بقى فضلتي تزني عليه

و عمالة تتكلمي كتير

و هو يعني مش رافض لكن بيسوف الموضوع

او نص متجاوب..

متجيش انتي بقى تحطيه قدام الامر الواقع

انه تقوليله كنت رايحة مشوار و عديت على ماما..

غلط جدا..

مثال تاني:

واحدة صاحبتك مثلا جوزك مش بيحبها قوي هي و جوزها

و انتي زعلانة و نفسك توديهم

و تجامليهم و قعدتي تزني على جوزك كتير..

براحتك قوي فى الاساليب الانثوية

من ودودة او زن او رمي كلام او حوار

او محايلة او مياصة او او او

لكن متلجأيش للاسلوب الذكوري بتاع

انك تستهبلي و تعزميهم

و تكلمي جوزك تقوليله "اتدبست فى اني عزمتهم النهاردة"...

بيأفوروا بقى هما قوي فى رد الفعل للطريقة دي..

هي مسألة "فرض الامر الواقع" على جوزك حلوة

لما تيجي تصالحيه او تمنعي بيها خصام

و الطريقة دي انا سميتها فى احد مواضيعي

طريقة "البرود مع الغتاتة"

فى انك تفرضي على جوزك امر واقع

انه احنا مش متخاصمين و تعامليه عادي بعد خناقة........

لكن بره الصلح مسألة "فرض الامر الواقع" على جوزك

عشان تقنعيه بحاجة غلط جدا

و هتجيب نتيجة عكسية و هيقولك هو انا مش مالي عينك

و هيأفور قوي قوي..

فانتي لما تحبي تفرضي حاجة على جوزك

خليكي فى الطرق الحريمي اسلم

من مكر و زن و حوار و رغي

و عياط و ابعدي عن طريقة "فرض الامر الواقع"

كرامة جوزي

الموقف الخامس:

الغيرة...طبعا و مش عاوزة كلام..

و الرجالة غير بعض فى الموضوع ده

و كل واحد غيور بطريقته

لكن انا رأيي

انك تسيبي المواقف اللي جوزك بيغير عليكي فيها تيجي لوحدها

لكن متلعبيش بالنار

(زي ما بشوف بنات كتير بيقولوا فى مواضيع)

و تتعمدي انك تثيره غيرته..

دا رأيي ان مسألة تعمد اثارة غيرة الزوج لعب بالنار فعلا..

و لو هو بيتعمد يثير غيرتك مترديش عليه المثل بالمثل

و لكن ردي عليه بالاستنكار او الطناش

او سلوك "ايه الاستظراف ده" يكون احسن

و ممكن نقول امثلة تانية كتير قوي بس الموضوع هيطول..

كرامة جوزي

و هحاول اختم الموضوع بطريقة توضحه اكتر

شوفي هي فكرة الموضوع فى الحاجات اللي بالنسبة لينا عادية

لكن الرجالة بيأفوروا قوي فيها

و تبقي فعلا بتسألي نفسك "هي مستاهلة كل ده"؟.....

كرامة جوزي

و الفكرة بتاعت افورة الرجالة فى حاجتين:

الحاجة الاولانية اللي هي مسألة ثقافة الاعتذار..
دي مش عند الرجالة فلو كان الموقف بسيط عديها يا ستي
و لو كان الموقف جامد و حقك انه يعتذرلك
يبقى حاولي متدخليش حد عشان
ميبقاش حد شاهد عليه و هو بيعتذر
و كمان بعد الاعتذار احتويه شوية
لانه بيبقى حاسس (و خصوصا لو اعتذر قدام حد)
انه اتذلل مش مجرد اعتذر

كرامة جوزي

و الحاجة التانية هي بقية الامثلة اللي تحسسك
ان الرجالة فرحانين قوي قوي بجملة " الجنس الخشن خشن و الجنس الناعم ناعم" و كل الامثلة بتحوم حوالين فكرة
انك متحليش محله او متفرضيش عليه شئ...
عشان كده زي ما قلتلك دايما خليكي مع جوزك بالاسلحة الانثوية زي العياط و الرغي و المكر و الزن و الحوار
و ابعدي عن الاسلحة الذكورية زي فرض الرأي او الصوت العالي او التدخل فى مشكلة هو مش عاوزك تدخلي فيها

​

 

رواتب الإطفاء في الكويت

اسعار هدايا التيك توك

مخالفات المرورالكويت

عدد المتابعين للربح من لايكي

مراسلة الفيس بوك

[bobkis]

جميل وعبارات منبهرة بجمال وروعة ما تكتبون
سلمت الأيادي
المعطرة بعطر الورود يا أحلى وردات الحقول..