كلمات مبعثرة
كاتب محترف
جه الوقت نتكلم عن فن الإيتامين
بما انهم قريبين جدًا من بعض مع اختلافات بسيطة
يلا نتكلم عنه بالتفصيل في موضوع جديد
الإيتامين بيندرج تحت فن التطريز ,, هما الاتنين خيوط مطرزه علي قماش
بس الاختلاف الجوهري ان الإيتامين بيتطرز بأشكال غرز معينة ,, وعلي قماش مخصص بالإيتامين
قماش الإيتامين شكله شبكي بخيوط متقاطعة مصنوع من القطن او الالياف الصناعية او الكتان
وفي نوعين من قماش الإيتامين
( الإيتامين السادة (الكونجرس) - الإيتامين المزدوج (بنيلوب) )
لو حابين نشتغل إيتامين ,, محتاجين ايه من الادوات ؟
بنحتاج 3 مواد اساسية
( نسيج - خيوط - ابر ) ونقدر نختار الادوات المناسبة علي حسب المنتج اللي عايزين ننفذها
- أولًا الإيتامين :
هو القماش اللي هنطرز عليه
أنواعه ( قماش الزوى - قماش جافا - قماش موسكاوا - قماش أيدا )
ضروري نختار إيتامين مناسب للمنتج المختار
- ثانيا الخيوط :
عندنا اختيارات واسعه جدًا من الخيوط نقدر نستخدمها زي الصوف والكتان والقطن والحرير
بالإضافة للخيوط المعدنية والذهبية والفضية وخيوط المكرمية والقيطان
ثالثاً: الإبر
وهيتم إختيار الابره علي حسب الخيط والنسيج
( لو الابره كبيره علي النسيج ده ممكن يغير حجم الثقوب في النسيج بالتالي هيفسد النسيج )
ويفضل تكون من الصلب المطلي بلاتين
بجانب الادوات الاساسية بنحتاج طاره تطريز - قلم لرسم التصميم - ورق كربون لطبع الرسمة علي النسيج
في بعض الانسجة اللي بتكون متوفره بالتصميم جاهزه ,, وبتكون ملونه كمان بحيث نبتدي تطريز بشكل أسرع
ودي مناسبة جدا في بدايه التعلم
نيجي للغرز ,,
اللي تعتبر تاني حاجه بتميز فن الايتامين عن التطريز العادي
عندنا بشكل أساسي نوعين من الغرز
(الغرزة المتقاطعة Crossed Stitches - الغرزة المتصالبة Cross Stitch )
بمجرد ما بنختار التصميم اللي حابين ننفذه ونعرف ادواته نقدر نبدع
الإيتامين مش صعب ,, ومفيش فن يدوي صعب لو اتدربنا عليه وقت كافي وبشكل مستمر وحبينا الي بنعمله
لو حابين تعرفوا عن فنون التطريز, الكروشيه, string art ,الباتشورك,الكويلينج, الريزن و الاميجرومي
وقولولنا فن جديد حابين تعرفوا عنه اكتر
