أسرار خالتى بكيزة لحياة زوجية لذيذة
أنا بقى هقولوكوا أفكار ساعدتنى فى مواقف كتير الحمد لله وبإذن الله تساعد عروسة أمورة فى بداية حياتها الزوجية
وياريت الزوجات و الأمهات المخضرمات تزودنا بنصائحهم الغالية وكلنا نستفيد من بعض و أى مشاركة هلاقيها مفيدة لينا هضيفها فى أول صفحة عشان نستفاد كلنا
ويا ريت لو لقيتوا موضوعى كويس ومفيد متنسوش التقييم
نبدأ بسم الله الرحمن الرحيم
-أول حاجة لازم تخدى بالك منها مهما حصل بينك أنت وجوزك أوعى تجرى تشتكى لأهلك عشان مهما حصل هترجعى أنت وهو تتصافوا وتتصالحوا لكن أهلك مش هينسوله أنه زعلك ومرة بعد مرة هيقل حبهم ليه وممكن تكون المشاكل إللى بينكم تافهه بس إى مشكله هتخرج من بينكم هتكبر والتافه هيبقى كبير وبالذات بقى لو عرف إنك بتحكى كل حاجة لأهلك ممكن يحسك خفيفة وبنت ماما زى مبيقولوا وبعدين كتر تتدخل أهلك فى مشاكلكم هخلي احترامه ليهم يقل وهيبطل يعمل لزعلهم حساب خلى أهلك دايما الخطوة الأخيرة إللى لما تلجئ ليها يحس أنه عمل مصيبة .
- أهل زوجك أوعــــــــــــــــــــــــــــــــــى مهما حصل تشتكيله ماماتك قالت أختك عملت أحذرى يا حبيبتى أنت لسه فأول حياتك معاه يعنى مهما كان بيحبك ممكن يحسك متحاملة على أهله ومتضمنيش أذا كان هياخد صفك ولا صفهم وبعدين أنت لسه بتتعرفى عليهم قدمى دايما حسن النية ومع الوقت هتتعرفى عليهم أكتر وتتأكدى بقى إذا كنتى ظلماهم ولا لأ ......... طيب لو أنتى واثقة ومتأكدة أنهم مش بيحبوكى و قاصدين يضيقوكى برضه أوعى تدخليه وتشتكليه حلى إى خلاف معاهم بهدوء ومن غير متغلطى نفسك وبالذوق كدة حسسيهم إنك مش بتحبى حد يتدخل فحياتك الشخصية وخدى بالك أنا بقولك حسسيهم يعنى متصرحيش كدة بالكلام عشان متبقيش قليلة الذوق معاهم وبعدين حطى دايما فبالك أن دى والدة زوجك حبيبك إللى لو عملتيها كويس هتؤجرى فيها بإذن الله وعشان ربنا يرزقك بعدين إن شاء الله بزوجة إبن حنينة مأنتى كمان فيوم من الأيام هتكونى أم زوج ولا إيه ؟
- الكلام الحلو زى بحبك ..وحشتنى ..بموت فيك بصى كل الرجالة بتحب تسمع كلام زى دة من زوجاتهم بس طبعا متشتغلش عمال على بطال وبالذات لو زوجك شخص تقيل وكل وحدة أدرى بجوزها بس أهم حاجة متزوديش فالكلام الحلو عشان ميثقش فنفسه زيادة عن اللزوم ويحسك مدلوقة عليه كل حاجة حلوة لما تكون بالعقل ومش زيادة
- خدى بالك من ألفاظك قدام زوجك وخليكى دايما البنوتة الشيك اللذوذة مش لازم بابى ومامى يعنى بس مفيش مانع من ميرسى أوكى وكام كلمة شيك كدة وبلاش إشطة وفكك وطحن عشان ميحسش أنه أتجوز صعبة مرعى طريقة كلامك قدام جوزك تختلف عن طريقة كلامك مع صحباتك ماشى يا قمر
- أوعى تقولى قدامه إنا معرفش أعمل كذا أو أنا مش فاهمه كذا لو في حاجة متعرفيش تعمليها أتعلمى لو فى حاجة مش فهماها دورى وحاولى تفهميها مش لازم تعرفيه نقط ضعفك بالتفصيل هو صحيح جوزك حبيبك بس أنتوا لسه بتتعرفوا على بعض كويس وخدى بالك الأنطباعات الأولى تـدووووووووووووووووووووووووووووووم
- حاولى دايما تطورى من نفسك أتعلمى أكلات جديدة أتعلمى حتى لغات جديدة هوايات جديدة خليه دايما يشوفك متجددة فجأيه بحاجة جديدة كل فترة وماشاء الله النت فيه كل حاجة
- فى حاجة مهمة لازم تخدى بالك منها فهزارك مع جوزك بلاااااااااااااااااااااااش الشتيمة بكل أنواعها الكلام دة حتى لو بهزار ممكن فيوم تكونوا متخانقين فلحظة غضب يغلط ويشتم عودية على أحترامك حتى فالهزار
منقول
هندوز
