كيف يكون دعم الزوجة

لما تلاقي زوجتك منكده متسيبهاش وتمشي وانت بتقول لنفسك هو احنا هنفضل على كدا كثير
الست بتحب تلح عليها وتحسسها انك معاها وسندها لما بتتضايق ، افضل وراها لغاية ما تعرف في ايه... هتقدر دا منك جدا وهيقلب مزاجها للاحسن وهي مبسوطه بك اوي
اسمعها بتعاطف واحضنها لو احتاج الامر
ولو هي بتنكد كثير وانت مش فاضي.. ساعدها تجدد طاقتها وتغير جو وتعمل اي شيء مختلف
بأنك مثلا تشجعها تروح جيم، وتنتظم عليه
بانها تروح تتعلم شيء في جمعية خيرية
تعطيها فلوس تروح السوق تشتري حاجه لنفسها.
او تشجعها تخرج شويه مع صديقتها
ولو عندك مشكلة ان زوجتك مش بتعرف تتناقش وانها سطحية ومخها على قدها.. ودا زي ما رجاله كثير بتوصف ستاتها !!
شجعها انها تطور من نفسها بان يكون عندها هدف يتفق مع ميولها وتشجعها انها تنفذه وتساعدها في شغل البيت شويه او تجيب لها خدامة تساعدها في المواعين مثلا
ودا علشان تلاقي وقت لتحقيق هدفها دا وانها تشغل مخها ومتركنوش على جنب بسبب انشغالها بالطبخ والتنظيف والاولاد واليوم اللي بيخلص على كدا .
#الخلاصة
لو عايز زوجتك تكون افضل متنقدهاش وخلاص لان دا مش حل وبيخلي النكد والخناق يزيد اكثر في البيت ، شوف ايه سبب ضيقها او ضيقك منها وساعدها انها تكون افضل بالكلمة الحلوه والتشجيع فهي مراتك وام اولادك وانت سندها في الحياة ملهاش غيرك بعد ربنا.
ودمتم على خير
وانا عارفه انكم هتعلقوا علشان تشجعونا
#رشا_حمودة
المستشارة الأسرية وممارس الدعم النفسي وتطوير الذات








​