ماهى الفضفضة المدمرة

قيثارة

كاتب جيد جدا
في ناس كثير بتحب تفضفض وبالذات الستات ودا بيخليها تستريح وتحس بالدعم المعنوي ودا شيء جميل خالص لو وجدنا من الآخرين الآتي
1) قلبوا معانا الموضوع بهزار وسخرية واحنا تفاعلنا مع هزارهم
2) هونوا علينا الأمر وحسسونا ان المشكلة بسيطة ومش زي ما احنا فاكرين.
3) ساعدونا في حل مشاكلنا ودا اكيد اجمل شيء
لكن كتر الفضفضه والشكوى للآخرين او عدم الاختيار الجيد للناس اللي هنفضفض معاهم بيكون له نتائج سيئة جدا علينا ودا بسبب التالي
1) دا بيخلينا مركزين اكثر على مشاكلنا ومش عارفين نستمتع بالنعم الموجوده في حياتنا وحوالينا ، ودا لان اغلب الوقت بنتكلم عن مشاكلنا، ودا كمان بيبعدنا عن الاحساس بالرضا اللي ربنا طالبنا به .
2) كتر الشكوى بتزود الهم في القلب ودا لاننا لما بنشتكي من علاقتنا بشخص ما احنا في الحقيقة بنرسل له طاقة كره ، والطاقة دي بتعود علينا من نفس النوع وبتحسسنا بخنقه في الصدر .
3) لو الشخص اللي بنشتكي له مشاعرنا لمست معاه وذكرته بأوجاعه وبدأ يحكي لنا عن مشكلته هو كمان وهو محروق او بيبكي او مخنوق دا بيخليه ينقلنا طاقته السلبية وبالتالي احساسنا بالهم بدل ما هو واحد بيكون همين .
4) لو كمان الشخص الآخر من كتر تفاعله مع شكوانا بدأ يعمم المشكلة ويحسسنا ان الدنيا سودا من حوالينا وكل الناس او الرجاله او الستات كدا ، او خوفنا اكثر بسبب ردوده وكلامه ، الطاقة السلبية ساعتها بتتضاعف جوانا .
#الخلاصة
حلوه الفضفضه بس خليها بكلمات قليله منكترش في سرد تفاصيل همنا ومشكلتنا ، وكمان لازم نختار من نفضفض له بعنايه يعني يكون من الشخصيات الإيجابية اللي هتخفف عنا
ولو الموضوع كبير الافضل نستشير متخصص معروف بالكفاءة والخبرة والحكمة علشان يساعدنا في حل مشاكلنا وازاي نكون اقوى معاها، وانا برحب بأي استشارة و لو محتاجين مساعدة راسلوني على الخاص
ودمتم على خير
 

مواضيع مماثلة

أعلى